Daniel Stamm Kassier / Webmaster II

Sälü zäme

Mi Name isch Dänu Stamm, ig bi 1973 gebore u wohne z'Bärn im Breitsch. Ufgwachse bi ni z'Huttu, wo ni nach mire Schueuzyt z'KV ufere Bank gmacht ha. Dert ha ni nächär o no es Zytli büglet. Im 95i bi ni für 7 Mönet uf Amerika gange, wo ni zersch e chli ine Schueu bi u aaschliessend no fasch quer dür z'Land greiset bi. Wo ni bi zrügg cho, bi ni äbe de uf Oschtermundige züglet u ha wider ufere Bank büglet. Dert bi ni blibe, bis i im Herbscht 1997 bi Schtudänt worde, u zwar a dr HSW Bärn. Im Herbscht 2000 hani z'Studium abgschlosse u bi itz Betriebsökonom FH. Sit denn bini ou wider am bügle, u zwar im Finanzbereich vom gröschte Schwizer Telekommunikationsabieter.

I minere Freizyt bini viu ungerwägs, sig das im Usgang (meischtens), a YB- oder SCB-Mätsche oder aber o (chunnt zwar säutener vor) bim Rollerblade, Schiifahre oder süsch irgendöppis. Mis gröschte Hobby si mini Kollege. We ni Zyt ha, bi ni immer zha für irgendwo eis ga z'zieh oder süsch öppis uf d'Bei z'schteue. I tue gärn jasse u ga ou öppe ids Chino.

I bi kes Gründigsmitglied vo däm Verein. I bi ersch alässlech vor Iichüblete 1999 dür nes Ufnahmeverfahre Mitglied worde. Vo de Chiubigigle ha ni dür e Kisu sen. erfahre. Är het mir verzeut, was hie gäng eso abgeit u ig ha gfunge, dass es super wär, es paar nöii Lüt lehre z'kenne u zwüschine öppis z'ungernäh. I ha sit mim Itritt i dä ehrewärt Verein scho mängi gueti Fuer (üb)erläbt u i fröie mi scho itz uf di nächschti.