Simon Beer Co-Redaktor

Gross vorschteue muess i mi ja äuä nid, mi kenne ja eigentlech aui (mängisch o Lüt, wo ni mi nüm cha dra erinnere). Auso, de wei mer mau:

I bi no ä ächte vieresiebzger, Geburi mitti Jahr. Nach de erschte vorgschissene Windle, nach de erschte Schritte, nach de erschte sexuelle Höhepünkt (Küss vom Grosi...) u nach äs paar witere prägende Erläbnis hani z'erschte Mau gmerkt, wie hert z'Läbe cha si. U das isch im Chindergarte gsi: Früh ufstah, ines Geböid gah, wo me gar nid härewot, luter Lüt, wo dr wei vorschribe, was z'tüe u z'lah hesch (mängisch ä Ohrfige verpasst bercho...) usw... Glich isches ir Schueu witer gange, nume isch es dört no herter gsi, wüu: Dört het's Notene für ds Lehre gä. U da ig immer so gärn glernt ha, hani immer gmacht, dass i no grad äs paar Zuesatzufgabe gha ha (Strafufgabe oder so nennt me das...). Aber i ha d'Schueu trotz auem erfougrich abgschlosse (?!?) und hami für ä KV-Lehre entschide (eigentlech hani gar nid gwüsst, was i wot mache...) u ha d'Lehr bir HATAG z'Mundige gmacht. Dört het's nächär ä Mönsch gha, wo so ziemlech aues i mim gsittete Läbe het umgschteut! Dr Name vo dere Pärson: Michi Kräuchi! Dä isch äuä aune ä Begriff, u so het's Läbe ä bösi Änderig mitsech zoge. Dür ihn hani so komischi Hobbyalkis kenneglehrt wie dr Dänu Strit, dr Kisu sen., Guido Mühlemännchen... (Meh muess i nech nid vorschteue, dass söt längä...) U so bini haut i di offnigi Bärner Trinkerszene inegrütscht...

Das het sech natürlech o uf d'Hobbys usgwürkt. Jaja, äs isch schtrub gsi, damaus... Aber trotzdäm isches relativ lang gange, bis mer au zämä gmerkt hei, dass mer gwüssi Vorliebine teile u hei üs ersch am 10. Jänner 1998 zure Interässegmeinschaft, dä Bärner Chiubigigle, zämegschlosse. Jawohl, auch Trinker haben Rechte!!! Da stani vou drhinger, u i ha ou ts Ämtli aus Redaktor agno, um erschti schuurnalistischi Erfahrige z'sammle!

Momentan bügli no uf dr Stüürverwautig, hoffe aber gli mau ä bessere Job z'brcho. Schliesslech wot me ja nid bliibe stah...