Näbscht em Tiff sim Bricht über üsi Party zum 5. Geburi vom VBCG gits hie (für d'Mitglieder) o no die Retroshow über di erschte füf Jahr Bärner Chiubigigle, wo dr Vorstand ahlässlech vo dere Iichüblete zeigt het.
(von Simon Beer)
Iichüblete... was söu mä daderzue no gross säge? Nun, d'Bsunderheit isch zersch mau gsi, das mir üs äs anders Lokal hei müesse sueche (z'Beaulieu isch scho bsetzt gsi). Fündig ischme z'Bümpliz im Kleefeld worde.
Also, auf denn, nach Bümpliz! Logisch hei mer äs Sääli gmietet, uftischet isch o scho gsi u d'Fässer mit der goldenen Gülle isch o scho ahkaret worde. Leider het's dr Hansueli nid so im Griff gha, genau derselbe isch nämlech abbroche! Z'Meischte isch de haut ufe Teppich glofe... jä nu, aus gits nid!
Nachdäm di erschte Problem us dr Wäut gschaffet si gsi, u o dr letscht Gigu no isch iitroffe, het dr Präser de die Iichüblete mau eröffnet. Mi hei itz auso füüf volli Jahr düreghaute, da het säch dr Vorschtand natürlech öppis geils überleit, aber das chunnt ja no...
Zerschmau isch di augemeini Begrüessig abghaute worde, när si d'Traktande wie Events u Ressort-News düreghoue worde. Schliesslech isches no zunere fiirlächä Verabschiedig cho vo zwe Vorschtands-Gigle: Da wäri mau dr langjährig Kassier, dr Sandro Longoni, wo sini Büetz immer zu vouschter Zfriedeheit gmacht het, u ig, dr Redakteur. Zum Abschied heimer beid no je zwe feini Fläsche Wy bercho (mini läbe übrigens nüm...)! Merci no einisch viumau für das Gschänk! Nöi aus Kassier isch dr Roberto Longoni (keep it in the family...?), dr nöi "Red" lost ufe Name Silvan Martinelli. Willkommen im Vorschtand, Gigle's! Ade, dir zwe Houdägene...
I möchti o nid zfescht i d'Traktande-Details ga, was für Events si u was schüsch no isch gange, wüsst dr ja bereits! Wichtig isch no (leider) dr Abschied vom Chiubigigu Guido Mühlemann, üse Hoffotograf, gsi. Är isch auerdings nid awäsend gsi...
Ahhh, ändlech het's när mau z'Ässä gä. Je nach Bschtellig hei teu Fondue Chinoise bevorzugt, di andere äs superfeins Filet vom heisse Schtei! Mmmmhhhh...
Da d'Biilage beschränkt si gsi bim Filet, heimer üs när no chli a d'Biilageplatte vo de Chinese-Heinis drahghaute. Auerdings hei di schlaue Sieche vo Bedienig das gmerkt, u si hei scho bau nüm bracht... hätte o gschieder äs nöis, intakts Bierfass häregschteut! Eh nu...
Ja, u när isch de mau d'Retroshow losgange! Ungschickterwys im letschte Journal bereits ahkündiget, isch de d'Überraschig doch no glunge, da di normale Gigle ja nid genau gwüsst hei, was das de isch! (Ätsch, Vorschtand!) Uf jedä Fau het's mänge Lacher gä, viu Föteli wo teu no nie hei gseh, Classics wome immer wieder gärn gseht... aues mügleche haut.
Merci no a Kälin u a Stamm für di ufwändigi Zämeschtellig vo derä superwitzige Show! Äs ächts Häiläit ir VBCG-History!
Fein isches gsi, z'Lokal isch oh guet u grümig gsi! Nach em
offizielle Teil ischme när verschobe zum Bus, u mir si mitere
"Massebewegig" ohni Umwäge diräkt az Bar-& Pubfescht ir
Feschthaue. Tja, u i gloube di zahlrichä Föteli redä ganzi Lexikon...
I däm Sinn: Bis zur nächschte Iichüblete, u när nämer mau äs
paari!!!
