(vor Susie Bosshard (Gönnerin))
Als Gönnerin bini mächtig gspannt gsy, was das für 'ne Abe wird wärde. Curling hani bishär nur vom Fernseh här kennt und eso schwierig gseht das ja nid us. Ig ha mi auso druf gfreut e unterhaltsame Abe mit de Chiubigigle und de angere Gönner z'verbringe.
Wo alli Lüt i dr Curlinghalle Grabengut in Thun iitroffe u verpflegt si gsy, hets de d'Erlüterige vom Organisator, em schwule Präser Hans-Uwe (teils o bekannt unger em Name Reto oder Gälänsch) gäh. Alli hei es Zetteli müesse zieh wo de e Nummere vo de jewilige Bahne druff isch gstande. So hets die Gruppene gäh wo de gägenand hei "curlet". Wo de alli es Bäseli und so'ne Rutsch-Finke (sorry, weiss halt nid wie me däm seit…) hei gha, isches also los gange. "Guet Stei" säge sie gloub.
Bevor me überhoupt het chönne afa spiele, het üs dr Iischmeischter d'Regle erklärt. Das me zum Bischpiu die Steine nid tuet umelüpfe sondern schön ufem Iisch tuet la gleite, gäuet Giele. A d'Spielbahn het me sich o zersch mau müesse dra gwahne. Da het sich zeigt, wär als chliine Schnudderi guet het chönne ziibe… *g*
U när isch me no es paar "Längine" mit de Bäseli hin und här ziibet. Nach dene Üebige isches de no nid sowitt gsi, itz chunnt ersch dr schwierig Teil: Wie zum Donner cha me das Gliichgwicht bhalte bim abstosse… u wie fescht muess me da überhoupt und wie geit itz das mit däm "dreh oder curl"??? Auso da hani wieder einisch gmerkt, dass we öppis eifach usgseht doch nid immer so eifach isch.
Zum Leidwäse vo es paar Spieler, hei de üsi Zueschouer (Nani und Tiff) sicher mängisch öppis z'schmunzle gha... item, es isch uf all Fäll ganz e "glatti" Sach gsi. Wie dr Spielusgang isch gsy und wär gwunne het… eeeh... ?Sorry?... das weiss ig leider nümme.
Nachdäm mir üs de wieder im Beizli vor Halle hei iigfunde isches de mal witer iz Restaurant Krone am Thuner Rathuusplatz. Dr Ruum isch ganz gediege gsi, isch wahrschiinlech o ds China-Restaurant, je nachdäm weli Bilder a dr Wand z'gseh si... die het me nämlech dür sone Schieb- u Roll-Mechanismus chönne uswächsle, gäu Thömu...
Irgendwenn vorem oder nachem Ässe, het de dr schwul Präser no einisch e chlini Asprach ghalte und no ds einte oder andere, wome inzwüsche o uf dr Houmpeitsch vo de Chiubigigle cha ga nacheläse, erwähnt.
Ds Menu, oder besser gseit die drü Menu wo's het zur Uswahl gha, si ganz guet usgläse gsy. Woby ig nur no weiss, dass es näbscht em Salat oder dr Suppe als Vorspiis, Spaghetti al Pesto het gäh oder Rösti mit emene Chiubigigu, aber ds andere weiss ig äbe alles nümme. Ig ha mir denn leider kei Spiischarte gschnappet gha.
Nachem Ässe u nach es paar Attackene mit Fötzeli oder Bierdeckeli het de dr eint oder ander dr gfüllt Büchu griebe u de si du scho es paar Lüt heizue oder witerzoge. Natürlech het dr Verdouigs-Schnaps nid dörfe fähle, das heisst, d'Greni-Bombene si nume so am füüre gsi. Spektakuläri Sach *g*
Das isch so ziemlech alles vo däm Abe, wo mir isch blibe. Gli mau het sech die Truppe gäge heizue oder anderwitig ufglöst gha.
Derzue möcht ig zum Schluss no säge, dass das wie obe scho mau gseit, e "glatti" Sach isch gsi und ig mi scho ufe nächscht Gönnerevent tue freue! Machet witer so!! Merci für dä glungnig Alass!
Härzlechscht
Eues Susie