(von Kisu sen.)
Aes isch ke Seich: am 29. Juni si d'Chiubigigléééé wieder mau go schüttelééé ufem Oberfäud in Ostermundigééé. Mä gseht, d'Chiubigigle us Bärn si sehr viusitig! Aui die wo z'Gfüeu hei, mir chönni nume Bierli vernichte si wieder mau "eines besseren belehrt worden"!
Ok, i bi ehrlech - äs si nid nume Chiubigigle i däm 10-er Team vorhande gsi. Unger angerem "dank" äs paar verletzte Chügeler (Peschééé u Bohnééé -> si hei när Coach gspiut oder ämu drgliiche ta) hei no äs paar Nid-Gigle Zueschlupf i üsem Team gfunge. Die ingesamt 5(!!!) "Usländer" hei aber när währendem ganze Turnier mächtig Dampf gmacht ufem Sand u o s'einte oder angere Goal gschosse.
We mä dr ganz Verlauf vo üsne Mätsche gneuer unger d'Luppe nimmt de muess mä scho fasch säge, dass mir mitem Tinu Bütikofer so öppis wie nä Oli Kahn im Goal u mit em Rohrbach Henä, Riedo Steffu u Lütthold Adrian scho fasch ä 3-R-Sturm hei gha wie d'Brasilianer. U mit em Hoschi hei mir eine gha, wo meh kämpft u mit meh spilerischi Glanztate brilliert het aus der Zidane. U äbä, üse Goali Büti isch sogar no besser gsi aus dr Kahn - är het ke einzige Fähler gmacht u o jede Ball chönne fasse.... (hihi, viva Brazil!!!)
Aber o die würkleche Gigle hei guet gspiut: Dr Hebu aus Ersatzgoali u zusätzleche Wirbuwind im Sturm het unger angerem mitemen sidefiine Witschuss sini Klass aus Fuessbauer la ufblitze. Dr Stibééé het grackeret u gschufftet u dä Huufe ufem Bitz zwüschedüre wieder organisiert u motiviert. Aus steiherte Verteidiger hat dr Läng (Kisu jun.) sine Gägner z'Fürchte glehrt u so üsne Goalis viu Arbeit abgno! Är isch o dr Einzig gsi, wo sini privati Cheerleederin het mitgno - was aber o üs angerne zuesätzlechi Chräft gä het. Dr Stamm het dank sire Grössi immer dr Überblick über z'ganze Spiu gha u är isch drum o immer dert go häufe wo Not am Mann gsi isch. Sini länge Stäuze umztrible isch füre Gägner nid immer eifach gsi - meischtens si sie blibe hange - u so hett dr Stamm när mänge torvorbereitende Pass chönne spiele.
I säuber ha aus Handbäueler müesse erfahre, dass Fussball haut glich ä völlig angere Sport isch. Erschtens isches schwär, ufem Sand äs kontrollierts Spiu ufzboue geschweige denn äs Goal zschiesse. Mis Ziu isch gsi, a däm Tag mindeschtens ei "Ofe" zmache..... das Ziu ha ig leider nid erreicht. Äs isch leider nume bimene Latteschuss blibe! I bi de när meh ir Verteidigung azträffe gsi u ha dert ufgruumt, u Wäutklass-Päss zu üsem Sturm gspiut aber leider o äs paar Freistöss verursacht. Aber das nid öppe, wüu ig unfair gspiut hätt, sondern wüu die gägnerische Schütteler nüt hei möge verliede u dür schaupsielerischi Meischterleischtige (mä seit däm gloub o "Schwaubene") d'Schiris zu Fäuentscheidige hei zwunge. Tja, d'Handbäueler unger üs hei müesse igseh, dass die handbauerischi Härti ufemene Schuttplatz nüt z'suche het. Die Weicheier vo Schüttteler möge das nid verliede - viu meh muess mä mit versteckte, fiese Fouls u verbale Attackene gäge Schiri dr Gägner versuche z'schlah!
Aber da mir ä perfekti Mischig us Handbäueler u würkleche Fussbau-Cracks (wo die obe beschribene Sache nid nötig u o nid gmacht hei!!) gsi si, hei mir das Turnier nach mim persönleche Idruck sehr erfougrich abschlosse.
Im erschte Mätsch si mir gäge "Espana" sang u klanglos 1:6 iigange! I dänke aber, dass üsi beide Coaches Peschééé u Bohnééé üs sehr schlächt uf dä Mätsch hei igsteut. Jedi Ordnig ufem Bitz het gfäut, äs het kene gwüsst, wo är muess stah, d'Regle vom Beachsoccer si no nid aune bekannt gsi, äs paar hei no dr Vorabe "im Chopf" gha. Tja, meh muess ig äuä nid säge.... u dass üsi zwe Coaches sich meh mit dä "Möscht" u dä "Chätzli" am Spiufäudrand aus mit üsem Spiu usenanggsetzt hei, het när o ke Roue me gspiut! Was hie aber no muess erwähnt wärde - "Espana" het när das Turnier gwunne. U das isch doch ä schöni Usreed...
Nachdäm mir Spieler das Truurspiu analysiert u die taktische Massnahme fürs nächste Spiu gäge "d'Red Sand Barons" ufgsteut hei, no einisch d'Regle düregange si, het eigentlech nüt meh chönne schief ga. Äs isch würklech super gsi, die Eigedynamik i üsem Team chönne z'beobachte... mir hei ja o aus saüber müesse bestimme, wüu üsi Coaches sich immer no nid für üses Team interessiert hei... und siehe da: Am Ändi vo dere Schlacht isch 3:3 gsi! Ä Ufwährtstrend isch z'gspüre gsi u dä het de när o aghaute!
Dür das Unentschiede si o üsi Coaches wach worde. Sie hei zwar bis zum Schluss vo däm Turnier nüt angers gmacht, aus üs zuegluegt u bi de schöne Szene apploudiert (u vo dene het's würklech jede Menge gha!), aber das isch immerhin chli öppis gsi. Meh hei mir Spieler o gar nid bruucht! Was die fougende Resultat idrücklech bestätige:
Gäge "Diesel" hei mir ä 0:2 Rückstang ufghout u churz vor Schluss no dr Füehrigsträffer chönne mache. Am Schluss hei mir gäge die Walliser-Hooligans 5:4 gwunne. Si mir ehrlech, we mir würkech aues hätte gä, wäre die Rohne-Fritze usem Wallis mit ere höchere Niederlag vom Spiufäud gfloge! Aber mir hei ja öppis fürs Spektakel wöue biete u drum d'Spannig höch bhaute.
D'Zueschauer uf dr mittlerwile gfüllte Tribüni si üs dankbar gsi u so hei mir üs i d'Härze vo de Zueschauer chügelet. Äs het chum meh ä Zueschouer gä, wo nid im Innerschte de Chiubigigle ghoufe het... D'Rohne-Schwümmer hei die Niederlag gloub nid so möge vertrage u hei sich när mit Gummibärli zueputzt. I finges scho truurig, we mä sich dr Chummer mit Alkohol muess abespüele.... tststs....
Am Schluss isches när zum ShowDown zwüsche de Chiubigigle u dä Lokalmathadore us Ostermundige cho. "Chiubigigle" gäge "d'Bierfründe Oschtermundige". Scho nume we mä die zwe Näme ghört, tribts eim z'Wasser itz Muu, dr Puls vo jedem Beachsoccer-Fan sött höcher schla - obschon das nume dr letscht Mätsch ir Vorrunde gsi isch... wie so oft... äs hätt dr vorzognig Finau chönne si! D'Chiubigigle hei no mau aues gä u die "Bierfründe" vom Platz gfägt! 6:3 isches am Schluss gstange. Dene hei mir so richtig dr "Chiubigigu" zeigt!
Leider het's trotz üsne überragende Darbietige nid glängt, ä Rundi witer zcho. Eis miises Pünktli het am Schluss gfäuht... u das hei mir bi üsem zwöite Mätsch vergä. Hey, Coaches..... nei, i säge nüt, dir wüsst was ig meine! Aber d'Chiubigigle hei sich scho wieder fürs nächschte Turnier agmäudet u dert schlö mir definitiv zue. Wenn üsi Nid-Gigle o wieder spiele u die gwohnte spielerische Impulse chöi setze, liegt dr erscht Platz ohni witeres drinne! U wenn dr wäutbescht Fan o wieder drbi isch, de cha würklech nümme schief ga! Gäu Tiff!
À propos erschte Platz... nachem Turnier ischs im Feschtzäut höch zue und här gange. U dert inne si d'Chiubigigle locker erscht worde! Aues angere wär ja o glachet! Mir chöi itz zwar Ischhockey u Beachsoccer spiele (u das de vom fiinschte!!!) aber im Après-Spörtle si mir immer no einsami Wäutklass u wärde o nie vo däm Platz verdrängt. I ha zwar die einti oder angeri "Bräms" gseh - dr Stamm het z'Gfüeu gha, äs sige sogar "Riiiiiiiiese-Hand-Brämse" - aber je später dr Abe isch worde, desto meh hei o die letschte Brämsene Gas gä! Schöööööööne! So muess es si! Was söu ig vo däm Abe no verzeue? Äs isch gsi wie immer... agfange het's mit:
"Chömet, itz näme mir mau äs Moscht!!!"....
"Hey, wo het's Chätzli???"...
"Äs het wieder mau nüt Gschiids ume!!!"...
"Hmmmm, de näme mir haut no einisch äs Moscht!!!"...
"Gäbet mau chli Gas, dir elände Brämsene!!!"....
"Het's würklech keni Chätzli???"....
"Nei!!!"....
"Auso, de näme mir haut no einisch ä Schuum!!!"....
"Schöööööööönéééééééé!!!"....
"Hey, näme mir no äs Moscht???"....
"Sicher doch!!! Hüt gäbe mir mau aues!!!"....
3 Stung später:
"Mir si vo dä Bärner Chiubigiglééééé... tralala,
tralali.........."
wieder äs paar Stung später:
"Hey, dir Brämsene, gö mir no itz "Dead End"???" (schöööööne
Stamm! Aber das mau isch dr Hebu no gange, u du eländi Bräms bisch hei
go lige!!!)
Gigle u Nid-Gigle, äs het gfägt! Bis zum nächschte Mau! Wenn's wieder heisst:
"Mir wei gsééééééé, üsi Chiubigigléééééé!!!" (oder äbä: Chiubigigle-Selection)
