(vom Hofi (Gönner))
Am 26. November 2000, am eis am Namitag, isch äs sowiit gsi: D'Mitglieder u d'Gönner hei sech im Bowling-Center Marzili zum ä gmüetläche Nami troffe. Dismau isch, natürläch, bowle agseit gsi!
Bim "Iiloufe" het me bi de meischte d'Spuure vom Frytig u vom Samschtig no dütlech chönne gseh. Die einte hei sich dr Chopf no äs bitzeli müesse häbä, die andere si no nid so gschprächig gsi u hei dr Magä mit ämäne Coca probiert z'beruhige.
Dr Kälin, sines Zeichä Presi, het de aber klar gmacht, das mer hie nid zum jammere da si sondern zum bowle. Är het's ä chli Schad gfundä, dass vor auem vo dä Mitglieder numä so wenig Amäudige si iigange. Äs het de am Schluss meh Gönner aus Mitglieder gha!!!
Im nä faire Rahme si när d'Spieler für die füüf Bahne usglost worde. Derbi het z'Los entschidä, wär das mit wäm zäme gschpiut het.
Für z'liblächä Woubefinde het dr Verein äs "Kontingänt" zur Verfüegig gschteut. Jedi u jedä het bir Bar sis Getränk gratis chönnä ga reichä. Merci viu mau für die grosszügigi Scheste!!
U när isch äs los gange: Vo "shit, scho wyder nüüt gsii" über "'dammi, warum schteit itz no so ä Souhung dert vore" bis zu "STRIKE" het me aues ghört.
We me nid grad am "Chugle hingere chlepfä" isch gsi, het me mit em Nachbar, mit dr Nachbarin oder mit öpper anderem Nöigkeite ustuuschet. So het me sich o besser lehre kenne.
Dr Wettbewärb ume Sieger isch de übrigens gar nid eidütig gloffe. Die erschte Sächs uf dr Ranglischte hei sech ä "Fight" glieferet, dass mes fasch nid gloubt het. Aber o im Mittufäud u am Ändi vo dr Ranglischtä isch dr Fau de gar nid klar gsi. D'Spannig isch vo Schuss zu Schuss gschtige.
Nach äm Game het jedi u jedä si Kater vo de beide Vortäg use gschwitzt gha. Die wo z'ersch numä äs Coca hei trunke, si itze scho wieder vou im Bier gsi!
D'Spannig isch gschtige, wo dr Kälin het d'Ranglischte übercho. Aui hei wöue wüsse wär itzä de o würklech "putzt" het.
D'Ranglischte gseht wie folgt us:
| 1. | Habi | 285 Punkte | Tagessieger - bravo!!! |
| 2. | Pesche | 273 Punkte | |
| 3. | Marcel | 273 Punkte | |
| 4. | Silvan | 267 Punkte | |
| 5. | Phippu | 243 Punkte | |
| 6. | Dänu | 242 Punkte | |
| 7. | Bruno | 238 Punkte | |
| 8. | Christoph | 235 Punkte | |
| 9. | Hofi | 225 Punkte | |
| 10. | Stibe | 221 Punkte | |
| 11. | Säne | 221 Punkte | |
| 12. | Erika | 218 Punkte | Beschtplatzierti Frou - bravo!!! |
| 13. | Peter | 210 Punkte | |
| 14. | Thomas | 208 Punkte | |
| 15. | Guido | 205 Punkte | |
| 16. | Mischu | 201 Punkte | |
| 17. | Niklaus | 201 Punkte | |
| 18. | Reto | 188 Punkte | |
| 19. | Esther | 181 Punkte | |
| 20. | Romain | 158 Punkte | |
| 21. | Tiziana | 157 Punkte | |
| 22. | Marianne | 145 Punkte | |
| 23. | Cédu | 142 Punkte | |
| 24. | Marc | 130 Punkte | |
| 25. | Marco | 116 Punkte |
Nachem Verläse vo dr Ranglischte si ä paari de leider scho gange. Die wo no si blibe, hei no eis oder zwöi Game(s) gschpiut. Me het gmerkt, das z'Game Durscht git. Itze isch me ersch rächt itz Bier!!!
Die wo nüme hei wöue bowle hei de när no afa töggele. Dert isch o aues gäh worde!!!
Für mi, wo z'erschte Mau het dörfe derbi si, het's so richtig gfägt. Im Name vo dä Gönner dankä mir am Verein vo dä Bärner Chiubigigle rächt härzlech u mir fröiä üs aui scho uf ä nächscht Event im 2001!