(von Guido Mühlemann)
Samschtig, 14. Novämber 1998, Schützenmatte. Äs paar verwirrti, aber supergeniali Giele warte druf, dass si abghout wärde. Äs chöme geng wie meh drzue, aber no isches grad nid ä sowit, dass me d'Schütz wider cha verlah. Äs wird immer no diskutiert, wieme äch a dä ominös Ort chunnt, wo dä erscht Special-Event vo de Bärner Chiubigigle über d'Bühni geit. Ändlech, äs wisses Toyota-Büssli hautet ganz brüsk näbe dere wartende Gruppe. Agschribe mit "Sonderfahrt Bärner Chiubigigle" grinset dr Reti Kälin hinger äm Schtüür füre. Me wartet no uf die Längwilige, wo nid chöi pünktlech si (Wäns betrifft? Die wüsses gloub säuber). Sofort wärde Täschene packt und d'Chiubigigle wärde ids Büssli verfrachtet. Ziemlech äng gschichtet, macht sech die fei grossi Gruppe ufe Wäg richtig Schwarzenburg.
Im Outo wird sofort blöd gschnuret und Wy sowie Chnobliwurscht verteilt (Cédu, merci für dini mildi Gab). Vom Parkplatz ufem Schwarzegg us geits ds Fuess öpä 20 Minute düre tief verschneit Waud. Dr Fuessmarsch isch ziemlech aaschträngend, wiu mir üs dr Schnee no nid gwöhnt si und ä verfluechti Bise geit. Ungeduldig wärde mir vo de räschtleche Vorschtandsmitglider erwartet.
Schnäu wärde d'Husreglä bekannt gäh und ds Bagage wird ide Schlafrüm (verdammi chaut) verschtout. Dr Habi klärt üs übere Ort wo mir üs befinde sowie übere witer Verlouf vo däm Wuchenänd uf. Vier Teams wärde biudet, wo de wichtig si für d'Schpiurundi. Ds erschtä Schpiu nennt sech "Wettsuffe", nei nid bis eine ungerem Tisch ligt, sondern weles Team het die schnäuschte Schluckschpächte.
Zwöi Teams kämpfe jewile gägenang, wär zersch d'Reihe düre het, isch Sieger u somit im Finau. D'Verlierer chöme i chli Finau und kämpfe (suffe) ume dritt Platz.
Dr Sieger isch erkore, nämlech ds Team vom Herr Beer (sorry, am Gott sis Team). D'Schpiurundi chunnt zumene witere Höhepunkt, nämlech ds säuber entworfene "Tabu". Jede Chiubigigu het 5 Begriffe müesse iischicke, dr Räscht isch när vomene Originau gno worde. Hie het am Habi sis Team zuegschlage, und das hushoch.
Nach dene zwöine Schpiu hei sech aui Teams churz zrüggzoge für äs Ufnahmeverfahre sowie dr "Bärner Chiubigigu des Jahres" ds wähle. D'Uswärtig für die beide Sache si vom Vorschtang uf ä nächscht Tag verschobe worde. Langsam isches richtig Nachtässe gange und d'Chiubigigle hei sech afah angerswitig betätige. Ä Teu het afah choche, ire Chuchi wo äuä mängem vo üs schräg isch inecho (wägäm Houzofe).
Ä angere Teu het sech umene grosse Holzpflock versammlet und versuecht Nägu iizschla. Was da dranne schpeziell söu si? Weme d'Kartonschachtle mit äm Läärguet und d'Äschebächer agluegt het, de weissme, was da dran schpeziell isch gsi. D'Chuchimannschaft isch vou konzentriert a dr Arbeit gsi, schnouse isch nid i Frag cho (dr Kisu sen. het jedem eis uf d'Finger ghoue, wos versuecht het). Ds Ässe (Gschnätzlets mit Röschti) isch de ou mau fertig gsi. De Chöch muess me a derä Schteu mau äs riese Komplimänt usschpräche: "Jungs, das war spitze". Am Abe ischme när no chli gmüetlech häre ghöcklet (gläge), dr Cédu het üs (die wo no hei möge; das si nümm ä so viu gsi) mit äre super Einmannshow ungerhaute.
Drzue het är üs "d'Chue mit de Fläcke" vorgschteut.
Dr Robi und Kisu sen. hei während dessi ä Schneebar vor dr Hütte igrichtet. Leider isches ä chli äng gsi. Aber was zeut isch ja dr guet Wille, und dä hei si auso gha. Langsam aber sicher het me sech ä geignete Schlafplatz gsuecht...
...und het vo Bier, Schwällus und natürlech vo schöne Froue (teu vo de eigete, teu vo Pin-Ups) tröimt. Am Sunntig isch no d'Uswärtig vom Samschtig ufem Programm gsi, sowie dr ganzi Souschtau (oder besser gseit: dr Chiubigiguschtau) wider ä so härzschteue, wie mir ne hei aatroffe. Nachämene usgiebige Zmorge isch no d'Wahl vom "Chiubigigu des Jahres" über d'Bühni gange. Drü Awärter hets gha, für dä wäutwit beliebtischt Titu. Dr Säne isch vorgschlage worde wäge sire Hochzyt, dr Kälin het üs ä "duftendi" Story verzeut, und dr Schriberling vo däm Bricht, ou dr schpäter "Chiubigigu des Jahres", het sini Träffsicherheit churz versuecht ds erkläre. Am Schluss isch no d'Rangverkündigung gsi. D'Sieger hei aus Belohnig nid müesse putze, sondern die hei früecher dörfe gah. Wie chönnts ou angers si, am Habi sis Team, mit em amtierende "Chiubigigu des Jahres" het de angere Teams zeigt, wieme gwinnt.
Ds ufrume isch ohni grösseri Zwüschefäu über d'Bühni gange. Vom Säne hani no erfahre, dass äs paar ganz Chranki no ä Schuttmätsch im Schnee düregfüehrt hei (äuä no WM-Nachwehe). Abschliessend möcht ig no im Name vo aune Chiubigigle äm Vorschtang für sini Bemühige und die 1a-Organisation vo däm erscht "Bärner Chiubigigle-Special-Event" rächt härzlech danke. Dr nächscht Event isch bereits in Planig und ig bi sicher, dass ou dä Alass ä huere geili Fuehr wird!
Für ä "Bärner Chiubigigu" het d'Guidöse versuecht, ä nid auzu trochene (hoffentlech) Bricht ds schribe. No einisch aune Beteiligte äs riese Lob für das geniale Wuchenändi.
Witeri Impressione...
