(von Thömu Kissling)
Dong... dong... dong... dr Chäfigturm schlat Sächsi am Abe. Es het no diversi Lüt wo dür d'Stadt stürme - di einte gö uswärts go ässe, angeri wöi scho iz Chino. U weme gnauer luegt, gsehtme, dassäch vorem Chäfigturm ä grösseri Gruppe vo junge Manne biudet. Wär isch äch das???
Um die Zit isch säch no kenä bewusst gsi, uf was das er säch hie iilat. Uf jede Fau si aui gueter Luune gsi u me hetsäch de, nachdäm jede no z'Portmonnaie gfüut het, ufe Wäg zum Nydeggstübli gmacht. Chuum dert aglangt hei di erschte Korke knaut u im Ruum het je längers je meh "die Farbe Gold" überhang gno.
Mmmmhh... di erschte Raclette se nache. D'Mäge hei afe knurre, z'Wasser isch eim im Muh zämegloffe... Aber nüt isch gsi mit vou dri schla u säch im Nu dr Ranze z'füue. Eis nachem anger hets gä, aber derfür isches superfein gsi. Übrigens: Z'aueriletschte Raclette hätmä ono ufem ISC-WC übercho!!!! Nachdäm meh oder weniger aui gnue gässe hei gha, ischme de zum "offiziellere" Teil vom Abe übergange.
D'Frag vomene Name für di Rassubande isch im Ruum gstange. Äs paar wenigi hei öppis wöue säge, doch isches langsam schwirig worde, die immer lüter wärdendi Horde z'übertööne. Schliessläch het jedä si Vorschlag ufene Fözu Papier gschribe.
D'Abstimmig für ä definitiv Name isch vo mir us gseh eine vo dä akustische u gfüueserregendä Höhepünkt gsi vo däm Abe. Wenn eine nid dr Chischteri het gha am nächschte Tag, chanersäch gad direkt bi de "Wiener Sängerknabe" mäude!
Plötzlech het di ganzi Autstadt zitteret... Was isch äch wider passiert? Grad ize isch dr Name
erkoore worde!!!
Zu däm Zitpunkt het gloub jede scho chli eine im Zinober obe gha u drum isches nid verwunderläch, dass es no ä Spinnelewittgumpwettbewerb het gä. Wär dä gwunne het, weiss äue hüt no niemmer...!
"ZAHLE" hets plötzläch us aune Richtige tönt u jede het müehsam si Ateil zum Portemonnaie uskratzt, obwou me eigentläch no Eis hätt wöue näh.
Schussändläch isches aber doch besser gsi, vorusse sine Gfüu freie Louf z'la...! Das när no ä Fläsche Whisky het d'Rundi gmacht, het teune nid gfaue, aber ä Schluck hetme säch de glich nid la nä. Imene fasnachtsähnläche Uftritt isches när via Metro richtig ISC gange. So öppis hets sicher ono nid mängisch gä, dass aune angere Passante si d'Ouge usegheit u ds Härz isch blibe sta!
Chum im ISC aglangt, hei d'Ordnigshüeter iri liebi Müeh gha, üs im Griff z'bhaute. O mir hei am nächschte Tag aui Chnoche weh ta. Was dert im ISC no aues süsch isch passiert, muess säch jede säuber probiere z'erinnere. Ig uf jede Fau ha mini liebe Müeh...